نظام محلات الزجاج والرخام — مخزون بالمقاس
لو بتشتري ألواح وبتبيع مقاسات، فالرصيد بالأرقام ما بيكفيش: 20 متر في لوح واحد غير 20 متر في عشر بواقي. زمام بيتابع كل لوح بمقاسه ورقمه، وبيقص على المقاس ويسجل البواقي من غير ما يلمس رصيدك، ويدير الطلبات والمواعيد والحسابات في نفس النظام.
كل لوح بمقاسه ورقمه مش مجرد رصيد
20 متر مربع في المخزن ممكن يكونوا لوح واحد كبير أو عشر بواقي صغيرة — والفرق هو إنك تنفذ طلب 3×2 أو تعتذر. زمام بيدي كل لوح رقم ومقاس، وبتشوف المتاح عندك بالمقاسات قبل ما توعد العميل.
القص بيحسب البواقي وبيحاول يكبّرها
تكتب المقاس المطلوب وزمام بيوريك القص قبل التنفيذ: القطعة وباقي واحد أو اتنين. ولو المقاس ما بيدخلش غير مقلوب ٩٠ درجة بيجرب كده. وبين طريقتين القص بيختار اللي بتسيب أكبر باقي — علشان الباقي يفضل صالح للاستخدام مش شرايح.
القص ما بيغيرش رصيدك ولا حساباتك
القص مش حركة مخزون — إجمالي الأمتار قبله وبعده واحد، اللوح بس بقى قطع. والنظام بيتأكد إن مجموع مساحات القطع يساوي اللوح الأصلي بالظبط، فمفيش متر بيضيع ولا بيتخلق في الدفاتر.
البواقي بتفضل في المخزون وليها قيمة
الباقي بعد القص مش خردة — ده مخزون بمقاس معروف ممكن يتباع بكرة. تتبع البواقي بيمنع إنها تتنسى في ركن المخزن لحد ما تتكسر، وبيخليك تبيع من الباقي قبل ما تفتح لوح جديد.
المرتجع بيقف في الحجر لحد المعاينة
لوح راجع من عميل ممكن يكون مخربش أو مكسور من طرف. القطعة الراجعة بتتحسب في رصيدك الفعلي بس مش معروضة للبيع لحد ما تعاينها — فما تبيعش لعميل حاجة لسه ما اتفحصتش.
زيارة المقاس وزيارة التركيب على نفس الطلب
شغلك بيبدأ بزيارة مقاس وبينتهي بزيارة تركيب. الموعد في زمام هو نفس الطلب وعليه تاريخ وفني وعنوان، وله حالته: مجدول، في الطريق، تم، أو مؤجل. والفني بيشوف زياراته على موبايله بالعنوان وتليفون العميل — من غير ما يشوف أي أسعار.
شغل حسب الطلب من عرض السعر للتصنيع
شباك أو واجهة بمقاس العميل: تعرف المنتج مرة بمدخلاته (عرض، ارتفاع، نوع الزجاج) ومعادلات خاماته وسعره، والطلب بيتحسب لوحده. ولما العميل يوافق، أمر التشغيل بيطلع من العرض بمدخلاته — من غير إعادة إدخال.
مفيش فاتورة بلوح ما اتحددش
على الفاتورة بتفتح قايمة القطع المتاحة بمقاساتها وتعلم على اللي هيتباع، والكمية بتطلع لوحدها من مجموع مساحاتهم. والتأكيد بيرفض أي سطر بمقاس من غير قطع محددة — فما تطلعش فاتورة بمتر مربع مالوش لوح.
وباقي المخزون عندك؟
المخزون بالمقاس ميزة جوه نظام مخزون كامل: مخازن متعددة وتحويلات وجرد فعلي وتنبيه الناقص وتكلفة لحظية — فالألواح والأصناف العادية بتتداروا من نفس المكان.
شوف حل إدارة المخزون ←أسئلة بتتسأل كتير
النظام بيعمل تعشيش (nesting) ويحسبلي أحسن توزيع للقص؟
بصراحة: لأ. زمام بيخطط القصة الواحدة اللي انت طلبتها ويوريك القطعة والبواقي، ويختار الطريقة اللي بتسيب أكبر باقي. لكنه مش برنامج تعشيش بيوزع عشر طلبات على ألواح بأقل هدر. والقص مستطيلات مستقيمة بس — مفيش أشكال منحنية ولا قص على منحنى. بنقولها بوضوح: لو التعشيش هو قلب شغلك، هتحتاج برنامج تعشيش جنبه، وزمام بيدير المخزون والبيع والحسابات.
تتبع المقاسات شغال في كل الشاشات؟
لأ، ودي نقطة مهمة تعرفها قبل ما تبدأ. الأصناف المتتبعة بالمقاس شغالة في: الشراء، وإذن الاستلام، والبيع، ومرتجع المبيعات، ومرتجع المشتريات، والقص. ولسه مش متاحة في: التحويل بين المخازن، والتسوية، والجرد، والتصنيع، ونقطة البيع. لو شغلك محتاج تحويل ألواح بين فرعين بالمقاس، دي حاجة تحسب حسابها.
العميل طلب بالتليفون ولسه ما حددناش اللوح — ينفع؟
ينفع. أمر البيع بياخد الكمية بالمتر من غير ما يحدد ألواح بعينها، وبيحجزها لك. ولما تيجي تفوتر، الفاتورة بتقف كمسودة علشان تختار الألواح اللي هتتقطع فعلاً، وبعدين تأكد. الخطوة دي مقصودة: اللوح بيتحدد وقت ما تعرفه، مش وقت المكالمة.
بنشتغل بالمتر المربع — الوحدات والتكلفة بتشتغل إزاي؟
الصنف القابل للقص وحدته متر مربع دايماً ومالوش وحدات بديلة، لأن الكمية بتطلع من مقاس كل قطعة مش من معامل تحويل. والتكلفة بالمتوسط المرجح. ده مقصود: مقاسات مختلفة وسعر متوسط واحد للمتر هو اللي بيخلي تكلفة الباقي منطقية لما تبيعه بعدين.
عندنا قماش ومفروشات مش زجاج — ينفع برضه؟
أيوة. نفس المنطق بيشتغل على أي خامة بتتشترى بالطاقة أو اللوح وبتتباع بالمقاس: القماش، والخشب وألواح الـ MDF، والرخام والجرانيت، والزجاج والألوميتال. الطاقة ليها رقم، والقص بيطلع بواقي، والبواقي بتفضل مخزون له قيمة.
وباقي الشغل — فواتير وعملاء وحسابات؟
كله جوه نفس النظام: عروض أسعار وفواتير وعرابين على الطلبات، وكشوف حساب عملاء تبعتها واتساب، وشيكات وتحصيل، ومخزون وتكاليف، ومحاسبة كاملة بقيود بتتسجل لوحدها مع كل حركة. المخزون بالمقاس ميزة جوه نظام كامل مش برنامج لوحده.
جاهز تمسك زمام شغلك؟
تجربة مجانية بدون بطاقة ائتمان — وفريقنا يساعدك في التهيئة خطوة بخطوة.